அரசு விருதுகள் மகிழ்ச்சி அளிக்கிறது: நடிகர் சங்கம் - தயாரிப்பாளர்கள் சங்கம் அறிக்கை

நடிகர் சங்க பொதுச்செயலாளர் விஷால் வெளியிட்டுள்ள அறிக்கையில் கூறியிருப்பதாவது:-

“2007-ம் ஆண்டு முதல் 2014-ம் ஆண்டுவரை உள்ள தமிழ் திரைப்படங்களுக்கான மானிய தொகை வழங்குதல் மற்றும் 2009-ம் ஆண்டு முதல் 2014-ம் ஆண்டு வரையில் உள்ள தமிழ் திரைப்படங்களுக்கு தமிழக அரசால் வழங்கும் மாநில அரசு விருதுகள் வழங்கும் அறிவிப்பானது தமிழ் திரையுலகினரிடையே மிகுந்த மகிழ்ச்சியை ஏற்படுத்தி உள்ளது.

இந்த அறிவிப்பினை வெளியிட்ட முதல்-அமைச்சர் எடப்பாடி பழனிசாமி, செய்தி துறை அமைச்சர் கடம்பூர் ராஜு மற்றும் அரசு அதிகாரிகளுக்கு தென்னிந்திய நடிகர் சங்கம் சார்பில் நன்றி தெரிவித்துக் கொள்கிறோம்”.

இவ்வாறு அறிக்கையில் குறிப்பிடப்பட்டு உள்ளது.


முதல்-அமைச்சர் எடப்பாடி பழனிசாமியை தலைமைச் செயலகத்தில், தமிழ்நாடு திரைப்பட தயாரிப்பாளர் சங்க தலைவர் விஷால், தமிழ்நாடு திரைப்பட இயக்குனர்கள் சங்க தலைவர் விக்ரமன், தென்னிந்திய திரைப்பட வர்த்தக சபை தலைவர் எல்.சுரேஷ், தமிழ்நாடு திரைப்பட நடிகர் சங்க உறுப்பினர் ஐசரி கணேசன் உள்பட சங்க நிர்வாகிகள் சந்தித்து பூங்கொத்து கொடுத்து நன்றி தெரிவித்தனர்.

தமிழ் திரைப்பட தயாரிப்பாளர்கள் சங்கம் வெளியிட்டுள்ள அறிக்கையில் கூறியிருப்பதாவது:-

“தமிழ் திரைப்படங்களுக்கு மானியம் மற்றும் விருதுகள் வழங்க வேண்டும் என்பது திரைத்துறையினரின் மிகப்பெரிய கோரிக்கையாக இருந்தது. அதனை பரிசீலித்து தற்போது 2007-ம் ஆண்டு முதல் 2014-ம் ஆண்டு வரையில் உள்ள திரைப்படங்களுக்கு மானிய தொகை வழங்கப்படும் என்றும் 2009-ம் ஆண்டு முதல் 2014-ம் ஆண்டு வரையில் உள்ள தமிழ் திரைப்படங்களுக்கு விருதுகள் வழங்கப்படும் என்றும் தமிழக அரசு அறிவித்து இருக்கிறது.

திரையுலகினரை பெருமையடைய செய்யும் மாநில அரசு விருதுகள் வழங்கும் அறிவிப்பானது தமிழ் திரையுலகினரிடையே மிகுந்த மகிழ்ச்சியை ஏற்படுத்தி உள்ளது. இந்த அறிவிப்பினை வெளியிட்ட முதல் - அமைச்சருக்கும், அமைச்சர் மற்றும் அதிகாரிகளுக்கும் தமிழ் திரைப்பட தயாரிப்பாளர்கள் சங்கம் சார்பில் நன்றி தெரிவித்துக்கொள்கிறோம்”.

இவ்வாறு அறிக்கையில் குறிப்பிடப்பட்டு உள்ளது.